Facebook, 
Twitter og 
RSS
Facebook, Twitter og RSS
Stéfan Einarsson vann fjorårets konkurranse med dette biletet. I år sit han i juryen.
Er du kreativ og engasjert nok for FN sin reklamekonkurranse? Her får du eksklusive tips frå eit jurymedlem til korleis du kan lage vinnarplakaten.
| Tekst: | Susanne Egset |
|---|---|
| Publisert: | 12.04.2011 |
FN arrangerer kvart år ein reklamekonkurranse, i år er bodskapen å ende vald mot kvinner. Å delta i denne konkurransen er ei verdifull erfaring for alle som er interessert i ei utdanning eller karriere i reklame, marknadsføring, grafisk design eller liknande.
Fjorårets vinnar, islendingen Stéfan Einarsson, fekk mykje mediemerksemd både nasjonalt på Island og internasjonalt, i tillegg blei han ettertrakta på arbeidsmarkedet. Bidraget til Einarsson vann i tillegg to reklameprisar på Island, og han blei plukka ut til å sitte i juryen i årets konkurranse.
– Det var veldig stort for meg å få så stor merksemd for verket mitt, og det kjennast spesielt godt sidan det var ei så god sak, seier Einarsson til FN-sambandet.
Einarsson laga fleire bidrag til konkurransen, her kombinerte han augene til Obama med kroppen til ein tynn, afrikansk gut.
FN tilbyr to hovudpremiar; ein jurypris og ein publikumspris, og vinnarane vil få sine verk publisert på konkurransen sin nettstad, i tillegg til fleire utstillingar og plassering i trykte medier over heile Europa.
Du eig sjølv rettane til verket ditt, og blir kreditert kvar gong det blir brukt i reklamesamanheng.
Er du under 25, stiller du også som kandidat til ungdomsprisen.
Stefan Einarsson vann fjorårets FN-konkurranse som gjekk ut på å lage ei reklame for å få slutt på fattigdom.
I sitt bidrag vendte han seg til verdensleiarar med bodskapen ”Dear world leaders, we are still waiting”.
I vinnarbiletet kombinerte han føtene til feilernærte afrikanske barn med overkroppane til fleire verdstoppar som ser ut som dei står i kø for å få mat. (Sjå bilete i toppen av artikkelen)
– Eg sikta på å skape ein kontrast mellom to verdenar, den rike og den fattige. Samtidig viser biletet at vi er alle like, vi har alle menneskekropp. Verdstoppane symboliserer makta og pengane i verda, men dei representerer også ansvar. Dei har eit ansvar om å gjere ord om til handling, og avskaffe fattigdom, seier Einarsson til FN-sambandet.
Du kan sjå fleire av Stéfan Einarsson sine verk og bli inspirert på nettstaden hans.
Einarsson sit i juryen til årets reklamekonkurranse som har bodskapen „Say no to violence against women“. Han har tidlegare laga reklamer for same formål som har blitt mykje brukt av organisasjonar for å bekjempe vald mot kvinner rundt om i verda, og oppfordrar så mange som mogleg til å delta i årets konkurranse og seie nei til vald mot kvinner.
– Eg gler meg til å sjå mange originale design og bodskap i konkurransen i år, og oppfordrar flest mogleg, uavhengig av alder og erfaring, til å delta. Mitt tips til deltakarane er å vere kreative, og at dei ikkje må begrense seg. Det er lov å provosere, og meininga med konkurransen er at bodskapen og designet skal oppofordre til å få slutt på eit stort problem som alle land i heile verda slit med; nemleg vald mot kvinner, seier Einarsson.
Konkurransen blir avslutta 31.mai. På nettstaden til konkurransen kan du sjå hittil innsendte bidrag og levere inn ditt.
English